Litva millisinin baş məşqçisi Edqaras Yankauskas Millətlər Liqasının yeni mövsümünün püşkatma nəticələrini dəyərləndirib. Litva seçməsi D2 qrupunda millimiz və Lixtenşteyn ilə mübarizə aparacaq. Litva Futbol Federasiyasının rəsmi saytına açıqlama verən mütəxəssis rəqiblər barədə bunları deyib: “Püşkatmanın nəticələrindən şikayətçi deyilik. Bilirik ki, qrupumuzdakı rəqiblərə qalib gəlmək mümkündür. Təbii ki, bizi asan oyunlar gözləmir, lakin yenidən C divizionuna yüksəlmək üçün var gücümüzlə çalışacağıq.

Şübhəsiz ki, Azərbaycan komandası Lixtenşteynlə müqayisədə daha yüksək səviyyəlidir. Onların heyətində ciddi avrokubok təcrübəsi olan futbolçular var. Xüsusilə “Qarabağ” nümayiş etdirdiyi futbolla tez-tez Avropanı təəccübləndirməyi bacarır. Bu klub yerli çempionatın flaqmanıdır və milliyə hamıdan çox oyunçu göndərir.

Azərbaycanın texnikalı futbol oynayan, “cənub tipli” bir komanda olduğunu bilirik. Son illər onlar üçün o qədər də uğurlu keçməsə də, düşünürəm ki, hazırda nəticələrdən narazıdırlar və daha çoxuna can atırlar. Bu qrupda hər kəsin hədəfi birdir: yuxarı diviziona qalxmaq.

“Sabah”ın baş məşqçisi Valdas Dambrauskasla məsləhətləşəcəyəmmi? Əlbəttə, Valdasla danışacağıq. Onun rəhbərlik etdiyi komandanın bir neçə üzvü Azərbaycan millisinin heyətində çıxış edir. Matçlara tam hazır olmaq üçün lazım olan bütün məlumatları toplayacağıq”.