Niderlandda şahmat dünyasının ən nüfuzlu yarışlarından biri hesab olunan “Tata Steel Chess” turniri davam edir. Azərbaycan qrosmeysteri Aydın Süleymanlı turnirin “Challengers” qrupunda mübarizə aparır.
Bu qrupda təmsilçimizlə yanaşı daha 13 şahmatçı birincilik uğrunda yarışır. Reqlamentə əsasən, dairəvi sistem üzrə keçirilən 13 turun yekununda qalib gələn şahmatçı, növbəti il dünyanın ən güclü qrosmeysterlərinin çıxış etdiyi elit “Masters” qrupuna birbaşa vəsiqə qazanacaq. Yarışın iştirakçı siyahısında ukraynalı əfsanəvi şahmatçı Vasili İvançuk və blits üzrə üçqat dünya çempionu, qazaxıstanlı Bibisara Asaubayeva kimi güclü rəqiblər var.
Turnirin 2-ci turunda Aydın Süleymanlı məhz B. Asaubayeva ilə üz-üzə gəlib. Gərgin keçən görüş heç-heçə ilə başa çatıb. Xatırladaq ki, şahmatçımız turnirə uğurlu start verərək, ilk turda yerli azarkeşlərin sevimlisi, niderlandlı Ervin L’Amini məğlub etmişdi.
13 turdan ibarət olan “Tata Steel Challengers” turniri fevralın 1-də başa çatacaq.