Bu axşam Qaziantepdə Türkiyə Superkubokunun yarımfinal mərhələsi çərçivəsində “Qalatasaray” və “Trabzonspor” üz-üzə gələcək. Bakı vaxtı ilə saat 21:30-da start götürəcək qarşılaşma Türkiyənin ATV kanalı vasitəsilə canlı yayımlanacaq.

Hər iki komanda həlledici matça ciddi itkilərlə çıxır.  “Qalatasaray”dan Afrika Millətlər Kubokuna (AMK) yollanan İsmail Yakobs və Viktor Osimhenlə yanaşı, Vilfrid Sinqo, Berkan Kutlu və Yusuf Demir də heyətdə yer almayıb. “Bordo-mavililər”ə gəlincə, AMK-da iştirak edən Onuaçu və Ulai ilə bərabər, əməliyyat olunan Viska və Baniya, həmçinin zədəli oyunçular — Saviç, Okay Yokuşlu və Mustafa Eskihellaç bu görüşü buraxmalı olacaqlar.

Qeyd edək ki, bu cütün qalibi yanvarın 10-da Atatürk Olimpiya Stadionunda keçiriləcək final matçında “Fənərbaxça” – “Samsunspor” duelinin qalibi ilə qarşılaşacaq.