Premyer Liqanın növbəti turu çərçivəsində keçirilən “Zirə” – “İmişli” matçı qolsuz bərabərliklə başa çatıb. Oyundan sonra hər iki komandanın baş məşqçisi mətbuat konfransında qarşılaşmanı şərh ediblər.

Meydan sahiblərinin baş məşqçisi Rəşad Sadıqov heyətdəki ciddi itkiləri önə çəkərək, vacib xallar itirdiklərini bildirib:

“Oyun gözlədiyimiz ssenari üzrə keçdi. Rəqib sıx müdafiə olunurdu, biz isə bu səddi yarmağa çalışırdıq. İlk hissədə nəzarət bizdə olsa da, vurduğumuz qol hesaba alınmadı. İkinci hissədə daha dinamik oynadıq, vəziyyətlər yaratdıq, lakin son nöqtəni qoya bilmədik.”

Sadıqov hücum xəttindəki kadr probleminin nəticəyə birbaşa təsir etdiyini vurğulayıb: “Son oyunlarda hücumda çətinlik çəkirik. Əsas hücumçumuz yoxdur və itkilərimiz çoxdur. Ümid edirəm ki, qış fasiləsindən sonra bu kadr problemlərini geridə qoyacağıq”.

“İmişli”nin baş məşqçisi Xose Mariya Kaskilya isə rəqibin gücünü etiraf etsə də, komandasının müdafiə performansından razı qaldığını deyib: “Rəqibin fərdi ustalıq və fiziki baxımdan bizdən üstün olduğunu bilirdik. Lakin taktiki cəhətdən oyuna çox yaxşı hazırlaşmışdıq. Standart vəziyyətlər istisna olmaqla, ‘Zirə’yə qapımız qarşısında ciddi imkan vermədik. Komandam yorğun idi. Bizim cəmi 4 gün, rəqibin isə 6 gün dincəlmək şansı var idi. Bu çətinliklərə rəğmən, səfərdən 1 xalla dönürük.”