“Qarabağ”ın 19 yaşlılardan ibarət komandasının oyununda insident baş verib. İngilis mətbuatının yazdığına görə, Gənclər Liqası çərçivəsində Bakıda keçirilən oyun zamanı “Qarabağ” azarkeşləri “Çelsi” oyunçularına qarşı irqçi hərəkətlər edib. Eyd olunur ki, 17 yaşlı hücumçu Sol Qordon oyunun 57-ci dəqiqəsində hesabı açıb və qol sevincini azsaylı tamaşaçılar arasında olan bir qrup azarkeşin yaxınlığında qeyd edib. Həmin azarkeşlər meydançaya tərəf qaçaraq futbolçularla qarşıdurmaya cəhd göstəriblər. Hadisə şahidləri “BBC Sport”a bildiriblər ki, bəzilərinin meymun hərəkətləri etdiyini görüb və eşidiblər. Oyun bir neçə dəqiqəlik dayandırılıb, futbolçular ukraynalı hakim Dmıtro Kubryaka şikayət ediblər. Baş məşqçi Kalum Makfarleyn də daxil olmaqla məşqçi heyəti müzakirələrə qoşulub. Bir müddət “Çelsi”nin oyunu dayandıracağı ehtimal edilsə də, komanda fasilədən sonra matça davam edib və 5:0 hesabı ilə qalib gəlib.

“Çelsi”nin bəyanatında deyilir:
“Biz bu gün Azərbaycanda keçirilən UEFA Gənclər Liqası oyununda baş vermiş insidentin fərqindəyik. Qol vurduqdan sonra bir neçə futbolçumuz tribunadakı bir nəfərin irqçi hərəkətlərinə məruz qalıb. İrqçilik və bütün ayrı-seçkilik formaları tamamilə qəbuledilməzdir və nə futbolda, nə də cəmiyyətdə yerinə malikdir. Biz bu hərəkətə yol verən şəxsin davranışlarını qəti şəkildə pisləyirik.”