Çempionlar Liqasının 3-cü təsnifat mərhələsinin ilk matçında «Sabah»ın qapısına iki qol vuraraq «Orxus»a (AGF) 2:1 hesablı qələbə qazandıran 18 yaşlı uqandalı hücumçu Ceyms Boqere gecənin əsas qəhrəmanı oldu. Geniş təbəssümü və gənc çöhrəsi ilə diqqət çəkən forvard, artıq Avropa futbol ictimaiyyətinə adını tanıtmağı başardı.
Danimarkada baş tutan qarşılaşma Boqere üçün əsl benefisə çevrildi. Gənc hücumçu təkcə iki qol vurmaqla kifayətlənmədi, həm də bunu hər iki ayağı (sağ və sol) ilə, yüksək estetik ustalıqla reallaşdırdı.
Peşəkar karyerasında ilk qollarını məhz təmsilçimiz «Sabah»ın qapısından keçirən uqandalı futbolçu matçdan sonra hisslərini belə bölüşüb: “Peşəkar karyeramda ilk iki qolu vurmaq mənim üçün xüsusi əhəmiyyət daşıyır. Həm bu qollar, həm də yaşadığım təcrübə uzun illər yaddaşımdan silinməyəcək. Özümə inanıram, hələ gəncəm və bu cür anların dəyərini bilməliyəm. Amma yaxşı anlayırıq ki, hələ heç nə bitməyib. Qarşıda bizi Azərbaycanda çox çətin cavab oyunu gözləyir”.
Boqere hesabı 2:0 edən qolundan sonra «Orxus» azarkeşləri önündə fərqli bir rəqs şousu təqdim etdi. Onun bu uzun sürən sevinci az qala sarı vərəqə ilə nəticələnəcəkdi. Lakin komanda yoldaşı Tobias Bek hakimin səbri tükənmədən onu vaxtında kənara çəkməyi bacardı.
“Qolları azarkeşlərimizlə qeyd etməyi çox sevirəm. Onlar hər zaman bizim yanımızdadırlar. Ona görə də bu sevinci onlarla bölüşmək mənim üçün çox xoşdur”, — deyə gənc oyunçu bildirib.
Mətbuat konfransına qədər hələ telefonundakı mesajları yoxlamağa fürsət tapmayan Ceyms, Uqandadakı «El Cambio» akademiyasının uşaqlarının bu matçı canlı izlədiyini öyrəndikdə kövrəlib.
Qeyd edək ki, «Orxus» 2024-cü ilin mayında Uqandadakı «El Cambio» futbol akademiyası ilə 15 illik strateji əməkdaşlıq müqaviləsi imzalayıb. Boqere də bu ilin əvvəlində komanda yoldaşı Hamuza Senqooba ilə birlikdə Danimarkaya gətirilib.
Gənc ulduz doğma yurdundakı kiçik futbolçulara ilham mənbəyi olmaqdan qürur duyduğunu vurğulayıb: “Əgər Uqandadakı gənc uşaqlar ekran qarşısına keçib oyunumuzu izləyiblərsə, bu, mənim üçün nəhəng bir motivasiyadır. Onların məni izləməsi mənə daha da böyük güc verir”. Danimarkada qazanılan 2:1 hesablı qələbə «Orxus»a cavab matçı öncəsi müəyyən üstünlük versə də, mərhələnin taleyi gələn həftənin çərşənbə axşamı Bakıda bəlli olacaq.