İspaniya millisi DÇ-2026-nın finalına vəsiqə qazandı. Luis de la Fuentenin komandası yarımfinalda rəqibinə heç bir şans vermədi. “Xoruzlar” mükəmməl təşkil olunmuş İspaniya müdafiəsini yara, Kilian Mbappe isə matçın sonunda əsəblərinə hakim ola bilmədi.
Oyunun ilk 15 dəqiqəsi kəşfiyyat xarakteri daşısa da, 20-ci dəqiqədə matçın ssenarisi dəyişdi. Lukas Dinin cərimə meydançasında Lamin Yamala qarşı qaydanı pozmasından sonra hakim penalti təyin etdi. Topa yaxınlaşan Mikel Oyarsabal qapıçı Mayk Menyanı məyus edərək hesabı açdı.
Qısa müddət sonra “üçrənglilər” müdafiədə ciddi itki ilə üzləşdi: zədələnən Uilyam Saliba meydanı tərk etdi və onu Maksens Lakrua əvəzlədi. İlk hissənin sonlarına yaxın İspaniya fərqi artırmağa, Mbappe isə hesabı bərabərləşdirməyə çalışsa da, qapıçılar ayıq-sayıq davrandılar.
İkinci hissəyə də İspaniya daha fəal başladı. 58-ci dəqiqədə Dani Olmonun mükəmməl və sürətli ötürməsindən sonra Pedro Porro fərqi ikiyə çatdırdı – 2:0. Bir neçə dəqiqə sonra Yamalın vurduğu qol isə ofsayd səbəbindən ləğv edildi.
Fransa oyuna qayıtmağa çalışsa da, hücumlar kəsərsiz idi. 82-ci dəqiqədə əvəzetmədən meydana daxil olan Dezire Due əlverişli imkanı əldən verərək boş qapıya yol tapa bilmədi.
Matçın sonlarında məyusluğunu gizlədə bilməyən Kilian Mbappe qapıçı Unai Simona qarşı kobudluğa görə sarı vərəqə ilə cəzalandırıldı. Əlavə olunmuş vaxtda rəqib qapısı qarşısında təzyiq yaratmağa çalışan fransızlar İspaniyanın intizamlı müdafiəsini yara bilmədilər.
Beləliklə, ispanlar üstünlüyünü qoruyaraq tam layiq olduğu DÇ-2026-nın finalına yüksəldi. Didye Deşamın komandası isə yalnız bürünc medal uğrunda mübarizə aparacaq. İspaniyanın həlledici matçdakı rəqibi İngiltərə və Argentina arasında keçiriləcək ikinci yarımfinal duelindən sonra məlum olacaq.
Dünya Kuboku, yarımfinal
Fransa – İspaniya 0:2
Dallas. “AT & T” stadionu
Hakim: İvan Barton (Salvador)
Fransa: Menyan, Kunde, Upamekano, Saliba (Lakrua, 30), Din (Hernandes, 72), Çuameni, Rabio (Kone, 46), Barkolya (Due, 57), Dembele, Olise (Şerki, 72), Mbappe.
İspaniya: Simon, Kukurelya, Laport, Porro (Loryente, 89), Kubarsi, Rodri, Fabian Ruis (Merino, 78), Yamal, Dani Olmo (Pedri, 78), Baena (N. Uilyams, 89), Oyarsabal (Ferran Torres, 74).
Qol: Oyarsabal, 22-p. (0:1). Porro, 58 (0:2).
Sarı vərəqələr: Rabio, 9. Kukurelya, 31. Mbappe, 88.