Dünya Çempionatında tətbiq edilən məcburi su fasilələri ciddi müzakirələrə və azarkeşlərin etirazına səbəb olub. Sport Bild nəşrinin məlumatına görə, İngiltərə – Xorvatiya matçında britaniyalı fanatlar FIFA-nın bu qərarını fitə basaraq kəskin şüarlarla protest ediblər.

Azarkeşlərin qəzəbi əsassız deyil: FIFA-nın turnirdən dərhal əvvəl qəbul etdiyi qaydaya əsasən, oyun hər hissədə bir neçə dəfə məcburi olaraq dayandırılır. Qurum bunu ABŞ, Kanada və Meksikadakı ekstremal bürkü və istilərdə futbolçuların sağlamlığını qorumaqla əsaslandırır. Lakin İngiltərə və Xorvatiya milliləri arasındakı qarşılaşma Dallasda (Arlinqton), xüsusi kondisioner sistemi ilə təchiz olunmuş qapalı stadionda, tam komfortlu temperaturda keçirilib. FIFA-nın bu qaydanı hava şəraitindən və stadionun növündən asılı olmayaraq, turnirin bütün 104 oyununa şamil etməsi azarkeşləri daha da qəzəbləndirir.

Tənqidçilər bəyan edirlər ki, FIFA-nın bu qərarının arxasında idmançıların sağlamlığı yox, gizli kommersiya maraqları dayanır. Dəqiq müəyyən olunmuş bu fasilələr yayımçı telekanallar və sponsorlar üçün yeni reklam bazarı deməkdir.

Digər tərəfdən, bu fasilələr oyunun təbii ritmini pozsa da, məşqçilər üçün göydəndüşmə fürsətdir. Məsələn, Almaniya – Kürasao matçından sonra bundestimin baş məşqçisi Yulian Naqelsman qərarı yüksək qiymətləndirib. O, bu qısa fasilə sayəsində taktik lövhədə komandasına həlledici tapşırıqlar verə bildiyini vurğulanır.