İngiltərənin “Hall Siti” klubu baş məşqçisi Serqey Yakiroviçlə yeni müqavilə imzalayacaq. Klubun sahibi Acun Ilıcalı The Athletic nəşrinə açıqlamasında xorvatiyalı mütəxəssislə danışıqların cəmi 5 dəqiqə çəkdiyini təsdiqləyib.

Mövsümün sonunda müqaviləsi başa çatan Yakiroviç komandanı Premyer Liqaya çıxardığı üçün mükafatlandırılır. Acun Ilıcalı danışıqlar prosesini belə təsvir edib: “Demək olar ki, heç bir uzun-uzadı müzakirə olmadı. Bütün şərtləri razılaşdırdıq və müqaviləni uzadırıq. Söhbətimiz cəmi 5 dəqiqə çəkdi. Zarafat etmirəm, hər şeyi 5 dəqiqəyə həll etdik”.

Premyer Liqaya “Mançester Yunayted” üzərindəki 2:0 hesablı tarixi qələbə ilə başlayan “pələnglər”in sahibi uğurun sirrini komandanın istəyində görür: “Bu mövsüm 3 əsas üstünlüyümüz var: autsayderik, hər kəs bizi zəif hesab edir və biz meydanda ürəklə oynayırıq. Bir çox komandada bu ruh çatışmır. Oyunçularımız üçün yeganə prioritet uğur qazanmaqdır”.

Cəmi 16 ay əvvəl III liqaya (Liqa 1) düşmək təhlükəsi yaşayan və transfer qadağası ilə üzləşən “Hall Siti”də Yakiroviçin gəlişi dönüş nöqtəsi oldu. O, komandanı pley-offa, ardından “Uembli”dəki finalda “Middlesbro”nu 1:0 üstələyərək elitaya daşıdı. 48 yaşlı xorvatiyalı mütəxəssis İngiltərəyə gəlməzdən əvvəl “Qoritsa”, “Maribor”, “Zrinjski”, “Riyeka”, “Dinamo Zaqreb” (Xorvatiyada qızıl dubl) və “Kayserispor”da çalışıb.