“Barselona”nın 18 yaşlı futbolçusu Lamin Yamal 2025-ci ildə heyranedici məhsuldarlıq nümayiş etdirib. “Göy-qırmızılar”ın vingeri başa çatmaqda olan təqvim ilində bütün turnirlər daxil olmaqla aktivinə 21 qol və 21 məhsuldar ötürmə yazıb.
Opta-nın məlumatına görə, gənc ispan Avropanın “Top-5” çempionatları arasında “20+20” həddini keçməyi bacaran iki oyunçudan biridir. Digər futbolçu isə “Bavariya”nın fransalı hücumameyilli yarımmüdafiəçisi Maykl Olisedir (onun hesabında 21 qol və 24 asist var).
Xatırladaq ki, Yamal “Qızıl top – 2025” səsverməsində Usman Dembeledən sonra ikinci yeri tutub. Olise isə 30 namizəd arasında sonuncu sırada qərarlaşıb.