“Sabah”ın baş məşqçisi Valdas Dambrauskas Bizon Azərbaycan Kubokunun yarımfinal mərhələsinin ilk matçında “Qarabağ”la qeydə alınan döyüşkən heç-heçəni (2:2) şərh edib. Komandasının oyunundan razı qalan mütəxəssis, eyni zamanda mətbuatda geniş müzakirə olunan transfer iddialarına da aydınlıq gətirib.

Matçın hər iki komanda üçün gərgin keçdiyini vurğulayan Dambrauskas, tamaşaçılar üçün maraqlı oyun nümayiş etdirdiklərini bildirib: “Hər iki kollektivi gözəl oyuna görə təbrik edirəm. Həqiqətən də baxımlı futbol izlədik. Milli komandaların oyunları ilə bağlı yaranan fasilədən sonra ritmə düşmək bir qədər çətin olsa da, komandamın performansından razı qaldım. Xüsusilə ikinci hissənin ortalarından etibarən daha yaxşı təsir bağışladıq. Hər iki komandanın qələbə şansı var idi. İndi bu oyunu unudub, diqqətimizi çempionat matçlarına yönəltməliyik. Cavab görüşünün də son dərəcə maraqlı keçəcəyinə şübhəm yoxdur”.

Hesabı açmalarına baxmayaraq, qələbəni qoruya bilməmələrinin səbəblərinə toxunan məşqçi, rəqib təzyiqinin işlərini çətinləşdirdiyini etiraf edib: “İkinci hissənin əvvəlində rəqibin güclü təzyiqi ilə üzləşdik və çox sadə top itkilərinə yol verdik. Əvvəlki matçlarda rahatlıqla qurduğumuz kombinasiyaları bu gün tətbiq etməkdə çətinlik çəkirdik. Görünür, fasilə öz təsirini göstərib. Növbəti oyunlarda bu çatışmazlıqları aradan qaldırmaq üçün əlimizdən gələni edəcəyik”.

Heyətdəki məcburi dəyişikliklərə də toxunan baş məşqçi, İqor Noqeyranı əvəzləyən Rəhman Daşdəmirovun oyununu yüksək qiymətləndirib: “Rəhman bizim üçün çox vacib futbolçudur. O, müdafiənin müxtəlif mövqelərində çıxış edə bilən universal oyunçudur. Hər bir futbolçumun daha çox şans qazanmağa layiq olduğuna inanıram və Rəhmanın bugünkü çıxışından tam razı qaldım”.

Mətbuatda “Sabah”ın Aleksey Kaşşukla maraqlanması barədə yayılan xəbərlərə mütəxəssis belə reaksiya verib: “Kaşşuk barədə yayılan məlumatlar sadəcə şayiədir. “Sabah“ çox xüsusi və nizamlı idarə olunan bir klubdur. Scout komandamız daim axtarışdadır və mən onların işinə tam güvənirəm. Transfer məsələləri ilə bağlı idman direktoru ilə mütəmadi müzakirələr aparırıq, lakin hazırda diqqətim avrokuboklara və ya gələcək mövsümə deyil, cari oyunlarımıza yönəlib. Rəsmi bir xəbər olsa, bunu mütləq paylaşacağıq. Yerli oyunçular isə hər zaman diqqət mərkəzimizdədir, onlar klubun vuran ürəyidir”.

Konfransın sonunda “Sabah”ın hər iki cəbhədə (həm çempionat, həm kubok) mübarizə aparmağa gücünün çatıb-çatmayacağı ilə bağlı suala Dambrauskas gülərək cavab verib: “Bu sualın cavabını sizin öhdənizə buraxıram. Sizcə, biz bunun öhdəsindən gələ bilərik?”