Bu gecə “Enfild”ə maraqlı futbol gecəsi yaşanacaq. Avropa Liqasında ilk səkkizlikdəki yerini möhkəmləndirmək istəyən “Liverpul” öz meydanında çempionmuz “Qarabağ”ı qəbul edəcək. Lakin mersisaydlılar üçün bu vəzifə heç də göründüyü qədər asan deyil: rəqib inadkar “Qarabağ”dırsa, Arne Slot eyni anda həm nəticəni, həm də heyəti qorumağı düşünməlidir.

Hazırda “Liverpul” düşərgəsində əsas diqqət UEFA-nın intizam qaydalarındadır. Qaydaya görə, liqa və pley-off mərhələlərində üç sarı vərəqə alan oyunçu növbəti matçı buraxmalı olur və bu limit 1/4 finala qədər sıfırlanmır. Bu məqamda “Qarabağ”la görüş, xüsusilə Kördis Cons üçün “mina sahəsi” effektini verir. İki sarı vərəqəsi olan Cons bu gecə xəbərdarlıq alarsa, komandasını növbəti mərhələnin ilk oyununda tək qoyacaq.

“Qarabağ”ın sürətli hücum xətti və gözlənilməz əks-hücumları qarşısında orta sahənin yükünü çəkən Consun itirilməsi Slot üçün böyük riskdir. Bu səbəbdən baş məşqçinin Consu ehtiyatda saxlayaraq, mərkəzi cəmi bir xəbərdarlığı olan Aleksis Mak Allister və ya Dominik Soboslaya həvalə edəcəyi gözlənilir.

Müdafiə xəttində isə vəziyyət nisbətən sabitdir. Konor Bredlinin zədəli olması Ceremi Frimponqun start heyətdəki yerini sığortalayır. Vircil van Dayk və İbrahima Konate kimi sütun oyunçuların cəmi bir vərəqəsinin olması, “Qarabağ”ın təhlükəli forvardlarına qarşı daha rahat mübarizə aparmağa imkan verəcək.Arne Slot üçün bu axşam əsas formul budur: “Qarabağ” kimi intizamlı rəqibdən 3 xalı qoparmaq, eyni zamanda ulduz oyunçuları cəza limitindən uzaq tutmaq. Turnir cədvəlindəki mövqe önəmli olsa da, “Liverpul”un Avropa hədəfləri üçün heyətin tamlığı həyati əhəmiyyət daşıyır.