Tarixi çempionluqdan sonra “Sabah” gözünü Çempionlar Liqasına dikib. “Bayquşlar”ın qitənin bir nömrəli turnirindəki ilk rəqiblərinin böyük qismi artıq bəllidir. 1-ci təsnifat mərhələsində səpilməmişlər sırasında yer alacaq komandamızın 13 potensial rəqib bəllidir. Siyahıda Qazaxıstan “Kayrat”ından tutmuş, Avropada səs salan Farer adalarının “Klaksvik”inə qədər müxtəlif klublar var: “Şemrok Rovers” (İrlandiya),  KuPS (Finlandiya),  “Drita” (Kosovo), “Linkoln” (Cəbəllütariq), “Borats” (Bosniya və Herseqovina), “Vikingur” (İslandiya), “Kayrat” (Qazaxıstan), “Universitatya” (Rumıniya),  “Larn” (Şimali İrlandiya), “Riqa” (Latviya), “KI Klaksvik” (Farer adaları), “Flora” (Estoniya), “Petrokub” (Moldova).

Uels çempionu “Nyu Seynts” və hələlik rəsmiləşməyən Ermənistan çemponunun hansı səbətdə yer alacağı isə hələlik qeyri-müəyyəndir. Qeyd edək ki, UEFA-nın mövcud reqlamentinə əsasən, Azərbaycan və Ermənistan klubları püşkatmada bir-biri ilə qarşılaşa bilməzlər.

Çempionlar Liqasının 1-ci təsnifat mərhələsinin püşkü 16 iyunda atılacaq. İlk oyunlar 7-8 iyul, cavab matçları isə 14-15 iyul tarixlərində baş tutacaq.