Afrika Millətlər Kubokunda (AMK) Nigeriya millisi ilə yarımfinala yüksələn ulduz hücumçu Viktor Osimhen, “CBS Sports Golazo”ya verdiyi müsahibədə “Qalatasaray”la bağlı diqqətçəkən açıqlamalar verib. Hazırda milli komandanın düşərgəsində olmasına baxmayaraq, təcrübəli qol maşını İstanbul klubu və azarkeşləri üçün çox darıxdığını səmimiyyətlə etiraf edib.
“Turnir bitən kimi İstanbula uçacağam”
Müsahibə zamanı Osimhenə ən çox maraq doğuran suallardan biri ünvanlanıb: Nigeriyanın finala çıxacağı təqdirdə, cəmi bir neçə gün sonra baş tutacaq “Qalatasaray” – “Atletiko” Çempionlar Liqası matçında iştirak edəcəkmi? Ulduz futbolçunun cavabı qəti olub: “Əlbəttə, oynayacağam. Mən ‘Qalatasaray’ üçün hədsiz dərəcədə darıxıram. Azarkeşlər mənə hər zaman sonsuz dəstək olublar. İndi ölkəmin mənə ehtiyacı var, amma turnir bitən kimi dərhal İstanbula qayıdıb komandaya qoşulacağam.”
“Atletiko”nu məğlub edəcək gücdəyik”
Çempionlar Liqasının klub və tərəfdarlar üçün daşıdığı əhəmiyyəti vurğulayan Osimhen, rəqibləri barədə də iddialı danışıb. O, Madrid təmsilçisini “əla komanda” adlandırsa da, “sarı-qırmızılılar”ın qələbəsinə inandığını bildirib: “Bütün dünyadakı “Qalatasaray” azarkeşləri üçün Çempionlar Liqası fərqli bir səviyyədir. Bizim ‘Atletiko Madrid’i diz çökdürəcək gücümüz var.”
Rəhbərlikdən xüsusi təyyarə həmləsi
Yeri gəlmişkən, “Qalatasaray” AMK-da Nigeriya millisinin heyətində çıxış edən Viktor Osimhen üçün xüsusi təyyarə planını işə salıb. ‘Sarı-qırmızılı’ rəhbərlik ulduz hücumçunu yanvarın 21-də UEFA Çempionlar Liqasında keçiriləcək “Atletiko” matçından əvvəl mümkün qədər tez İstanbula gətirməyi hədəfləyir.
Əgər Nigeriya yarımfinalda məğlub olub turniri tərk edərsə, Osimhen cümə axşamı Mərakeşdən gətiriləcək. Nigeriya çempion olarsa, o, qələbə qeyd etmələrindən sonra, yanvarın 19-da İstanbula qayıdacaq.