Səudiyyə Ərəbistanının “Əl-Nəsr” klubunda baş məşqçi ayrılığı rəsmiləşib. Cari ilin mayinda komandaya çempionluq sevinci yaşadan portuqaliyalı mütəxəssis Jorje Jesus postunu tərk edib. Ərəb klubu onun yerinə gətirilən yeni baş məşqçinin adını da açıqlayıb. Kriştianu Ronaldunun çıxış etdiyi komandanı bundan sonra avstraliyalı sükançı Anj Postekoqlu çalışdıracaq.
2025-ci ildə London “Tottenhem”i ilə Avropa Liqasının qalibi olan Postekoqlu “Əl-Nəsr”lə 2 illik müqaviləyə qol çəkib.
60 yaşlı mütəxəssisin son iş yerləri o qədər də uğurlu alınmayıb. “Tottenhem”dən qovulduqdan sonra ötən ilin payızında gözlənilmədən “Nottingem Forest”in sükanı arxasına keçən avstraliyalı çalışdırıcı, İngiltərə klubunda cəmi 39 gün dözə bilmiş və uğursuz nəticələrə görə istefaya göndərilmişdi. İndi onun qarşısında Səudiyyə Ərəbistanında yenidən özünü sübut etmək və dünya futbolunun canlı əfsanəsi ilə ortaq məxrəcə gəlmək kimi çətin bir tapşırıq durur.