Bu gün Bakı vaxtı ilə saat 20.00-da Çempionlar Liqasının əsas mərhələsinin püşkü atılacaq. “Qarabağ”ın çıxış etdiyi Avropanın mötəbər turnirində qitənin azı iki adlıl-sanlı klubunun Bakıya gəlmək şansı var. Azərbaycan təmsilçisi 4-cü səbətdə yer alıb.

Püşkatmanın nəticələrinə əsasən, hər klub hər səbətdən (o cümlədən öz səbətindən) iki rəqib qazanacaq. Beləliklə, komandaların hamısı səkkiz oyun keçirəcək: dördü evdə, dördü isə səfərdə. Bir ölkədən olan klublar bu mərhələdə bir-biri ilə qarşılaşa bilməz. Həmçinin, eyni ölkədən maksimum iki rəqiblə oynamaq məhdudiyyəti də var. Yəni əgər “Qarabağ”a “Barselona” və “Real” düşsə İspaniyadan üçüncü bir komanda ilə qarşılaşa bilməyəcək.

Əgər rəqiblər püşkatma zamanı dərhal müəyyənləşsə, oyunların təsdiqlənmiş tarix və başlama saatı ilə yekun təqviminin 30 avqustda açıqlanması gözlənilir.