Etiraf edək ki, “Qarabağ” UEFA Çempionlar Liqasının 3-cü təsnifat mərhələsində Şimali Makedoniyanın “Şkendiya” komandası ilə duelin favoriti sayılsa da, həm ağdamlılarda, həm də azarkeşlərdə müəyyən narahatlıq vardı. Buna səbəb skopyelilərin 2-ci təsnifat mərhələsində gözlənilmədən güclü Rumıniya təmsilçisi FKSB (Styaua) klubunu yenməsi idi. Rumıniyanın adlı-sanlı komandasını turnirdən kənarlaşdıran Jeton Bekirinin komandasının qələbə iştahası da artmışdı. Elə bu üzdən də Qurbanov oyunöncəsi mətbuat konfransında ehtiyatlı danışırdı. Lakin oyun başlayar-başlamaz “Şkendiya”nın “Qarabağ”dan aşkar zəif olduğu ortaya çıxdı.
“Qarabağ” ilk yarıda üstünlüyünü Toral Bayramovun penaltidən vurduğu qolla təsdiqləyə bildi. 11 metrəlik cərimə zərbəsini həmin epizodda mübarizlik göstərən Andrade qazandı.
İlk yarıda olduğu kimi, ikinci hissədə də “Qarabağ” rəqibindən üstün oynadı. Zubir azı üç dəfə hesabı artıra bilərdi. Rəqibin isə ikinci hissədə bir ciddi qol imkanı oldu. Daha bir epizodda isə Cəfərquliyevin kobud səhvi təhlükəli qol epizoduna çevrilmədi. İbraimi cərimə meydançası kənarından zərbə ilə kifayətləndi.
Qeyd edək ki, Qurbanovun yetirmələrinin fiziki və funksional hazırlığı əvvəlki mövsümlərlə müqayisədə daha yaxşıdır. Komanda daha mütəşəkkil, hərəkətli və taktiki cəhətdən hazırlıqlı görünürdü. Odur ki, Şimali Makedoniya təmsilçisini rahatlıqla keçməsi gözlənilən qarabağlılar pley-offda da favorit olacaq.
UEFA Çempionlar Liqası
3-cü mərhələ, ilk oyun
5 avqust, Skopye. Hakimlər: İvan Kruzliaka, Branislav Hançko, Yan Pozor, Peter Kraloviç
“Şkendiya” (Şimali Makedoniya) – “Qarabağ” (Azərbaycan) – 0:1
Şkendiya: Qaye, Cake, Vebster, Fetai, Trumçi, Alhassan (Qake, 46), R. Ramadani, Latifi (Krstevski, 69), Krasniçi (Zeynullai, 46), Tamba (Ademi, 81), İbraimi (F. Ramadani, 89).
Qarabağ: Koxalski, Medina, M. Silva (A. Hüseynov, 80), Mustafazadə, T. Bayramov (Cəfərquliyev, 73), Zubir, Kadi (Kaşuk, 73), Bikalyo, Andrade (Kuaku, 80), Addai (Yankoviç, 58), N. Axundzadə.
Qol: Toral Bayramov, 18-p.