Polşanın Katovitse şəhərində keçirilən Avropa çempionatında gümüş medalla dönən şahmatçımız Nicat Abasov turnirdəki çıxışı və qazandığı nəticə ilə bağlı fikirlərini bölüşüb. Azərbaycan Şahmat Federasiyasına (AŞF) istinadən verilən məlumata görə, qrosmeyster həm şəxsi hədəfləri, həm də komanda yoldaşlarının çıxışı barədə danışıb.

Turnirə böyük iddia ilə yollandığını vurğulayan Abasov, son illərdəki çıxışını belə şərh edib: “Avropa çempionatına yollanmazdan əvvəl qarşıma maksimum məqsəd qoymuşdum. Son illər Dünya Kubokuna vəsiqə qazansam da, mükafatçılar sırasına düşə bilmirdim. Keçən il son tura qədər medal uğrunda mübarizə aparsam da, almaniyalı Mattias Blübaum ilə heç-heçə edərək kürsüdən kənarda qaldım. Bu dəfə isə əsas hədəfim mütləq medal qazanmaq idi”.

Qrosmeyster turnirin həlledici anlarını təhlil edərək, qızıl medalın bir addımlığında olduğunu qeyd edib: “Yarışın sonu bir qədər təəssüf doğurdu. Son turlarda liderlər qrupunda qərarlaşmışdım. Hesab edirəm ki, çempionluq şansını 10-cu turda əldən verdim. İspaniya təmsilçisini cəmi bir gedişlə məğlub etmək mümkün idi. 11-ci tur isə psixoloji baxımdan ən çətin mərhələ oldu, sanki final oyununa çıxmışdıq”.

Nicat Abasov fərdi nəticəsindən başqa, ümumi komanda uğurunu da yüksək qiymətləndirib. O, üç şahmatçımızın son tura qədər çempionluq şansını qorumasının qürurverici olduğunu bildirib: “Fəxri kürsüdə iki azərbaycanlı şahmatçının yer alması ölkəmizin böyük uğurudur. Məhəmməd Muradlı da medala layiq idi, o, yarışın ikinci hissəsini çox yüksək səviyyədə keçirdi. İnanıram ki, bu nəticə bizim üçün əlavə stimul olacaq və növbəti turnirlərdə daha böyük uğurlara imza atacağıq”.