Beynəlxalq Futbol Federasiyaları Assosiasiyası (FIFA) milli komandaların 2026-cı ilin aprel ayı üçün növbəti reytinq cədvəlini elan edib. Son bir ayın nəticələrinə görə millimiz üç pillə irəliləyb.
Son dövrlər nümayiş etdirdiyi oyunla diqqət çəkən yığmamız, dünya sıralamasında mövqeyini yaxşılaşdırmağa nail olub. Ötən ayla müqayisədə 3 pillə irəliləyən komandamız 124-cü pillədə qərarlaşıb. Hazırda millimizin aktivində 1136,67 xal mövcuddur.
Cədvəldəki rəqiblərlə xal fərqinə nəzər salsaq, rəqabətin kifayət qədər gərgin olduğunu görmək olar. Belə ki, yığmamız 123-cü pillədəki Farer adalarından (1137,14) cəmi 0,47 xal geri qalır. 125-ci yerdəki Surinam (1132,43) isə artıq millimizin gerisindədir.
Reytinqdəki bu yüksəlişin əsas səbəbi Bakıda təşkil olunan “FIFA Series” turnirindəki uğurlu çıxışdır. Xatırladaq ki, komandamız turnir çərçivəsində keçirdiyi hər iki qarşılaşmada müsbət nəticə əldə edib: Sent-Lusiya ilə matçda 6:1 hesablı məğlub edib və Syerra-Leone ilə heç-heçə bitən (1:1) oyunda isə rəqibi penaltilər seriyasında yenib – 9:8.
UEFA Millətlər Liqasının D divizionundakı gələcək rəqiblərimizlə müqayisədə Azərbaycan millisi reytinq baxımından xeyli öndədir. Rəqiblərin mövcud vəziyyəti belədir: Litva 1058,42 xalla 148-ci, Lixtenşteyn isə 803,57 xalla 206-cı pillədə qərarlaşıb.
Reytinqin yuxarı onluğunda isə ciddi rəqabət davam edir. Fransa millisi az fərqlə İspaniya və Argentinanı qabaqlayaraq birinciliyini qoruyub.
Dünyanın “Top-10” komandası:
1. Fransa – 1877,32
2. İspaniya – 1876,40
3. Argentina – 1874,81
4. İngiltərə – 1825,97
5. Portuqaliya – 1763,83
6. Braziliya – 1761,16
7. Niderland – 1757,87
8. Mərakeş – 1755,87
9. Belçika – 1734,71
10. Almaniya – 1730,37
Mərakeş yığmasının 8-ci pillədəki mövqeyini qoruması və Almaniyanın onluğu qapatması aprel ayının əsas statistik məqamlarından biri kimi qeyd olar.