Formula-1-in canlı əfsanəsi, 57 yaşlı yeddiqat dünya çempionu Mixael Şumaxer özünü daha yaxşı hiss etməyə başlayıb. Bu barədə Şumaxerin malikanəsində olan və hadisə şahidləri ilə həmsöhbət olan “Daily Mail” qəzetinin jurnalisti Conatan MakEvoy yazıb.

Məlumata görə, dünya çempionu artıq yatağa məhkum deyil və tibbi personalın köməyi ilə ev daxilində əlil arabasında hərəkət edə bilir. Mixael hələ də sutkalıq tibbi nəzarət altındadır və həyat yoldaşı Korinnadan böyük dəstək alır.

Hadisə şahidlərindən biri pilotun vəziyyətini belə təsvir edib:

“Onun hər şeyi tam dərk edib-etmədiyini əminliklə söyləmək çətindir, çünki o, danışa bilmir. Lakin ətrafda baş verənlərin bir hissəsini anladığına dair hissiyyat var, hərçənd ki, bu, yəqin ki, hər şeyi əhatə etmir”.

Xatırladaq ki, Şumaxer 12 ildən çoxdur ki, Fransa Alplarında xizək sürərkən aldığı ağır kəllə-beyin zədəsindən sonra ictimaiyyətə görünmür. O, sürətli trasda yıxılaraq başını daşa vurmuşdu.

Bundan əvvəl mətbuatda Mixaelin 2024-cü ildə qızının toyunda ilk dəfə insanların qarşısına çıxdığı və məxfiliyi qorumaq üçün qonaqların mobil telefonlarının əlindən alındığı barədə xəbərlər yayılmışdı. Lakin “Daily Mail” nəşri bu iddiaları təkzib edərək, həmin xəbərlərin həqiqəti əks etdirmədiyini bildirib.