“Bavariya”nın canlı əfsanəsi Manuel Noyer Çempionlar Liqasının (ÇL) “Real”la baş tutan qarşılaşmasında növbəti dəfə ustalığını nümayiş etdirib. Münhenlilərin Madriddə qazandığı 2:1 hesablı qələbədə aslan payı məhz 40 yaşlı qapıçıya məxsusdur.

Matçın “ən yaxşı oyunçusu” seçilən Noyer Madrid səfərində rəqibin 9 təhlükəli zərbəsini dəf edərək komandasını qələbəyə daşıyıb. “Opta” statistika mərkəzinin məlumatına görə, ÇL-in pley-off mərhələsi tarixində indiyədək heç bir qapıçı “Santyaqo Bernabeu” stadionunda bir oyunda 9 seyv etməyə müvəffəq olmamışdı. Bununla da alman qolkiper Madrid arenasında yeni rekorda imza atıb.

Noyer təkcə oyun göstəriciləri ilə deyil, çıxdığı matç sayına görə də tarix yazmağa davam edir. Almaniyalı əlcək sahibi ÇL-də eyni komandanın formasında 136-cı dəfə start heyətində meydana çıxmaqla, bu göstərici üzrə “Barselona”nın sabiq ulduzu Lionel Messiyə çatıb.

Hazırda turnir tarixində eyni klubun heyətində əsas onbirlikdə ən çox yer alan oyunçu isə “Real Madrid”in əfsanəvi kapitanı İker Kasilyasdır (150 oyun). Noyerin forması və davamlılığı onun yaxın gələcəkdə bu mütləq rekordu da yeniləməyə əsas namizəd olduğunu göstərir.

Xatırladaq ki, bu komandalar arasındakı cavab qarşılaşması aprelin 15-də, çərşənbə günü Münhendə keçiriləcək. İlk oyunda qazanılan minimal üstünlük “Bavariya”nı final yolunda bir addım öndə tutsa da, Madriddəki möhtəşəm performansı ilə diqqət çəkən Noyerin cavab matçındakı çıxışı da həlledici olacaq.