Tramplindən tullanma üzrə Finlandiya milli komandasının baş məşqçisi İqor Medved qəbulolunmaz davranışının səbəbini izah edib. Sloveniyalı mütəxəssis Finlandiya yığması ilə əməkdaşlığına vaxtından əvvəl xitam verilməsinə səbəb olan insident barədə danışıb.

“Çərşənbə axşamı keçirilən yarışlardan sonra sloveniyalı idmançıların qızıl medal təqdimetmə mərasiminə dəvət aldım. Heç nə yeməmişdim və təəssüf ki, spirtli içki öz sözünü dedi. Özümlə fəxr etmirəm, lakin komandamla və son iki ildə gördüyümüz işlə fəxr edirəm. İndi əsas məqsədim uşaqları ruhlandırmaq və vurduğum ziyanı minimuma endirməkdir” — deyə Medved Meczyki nəşrinə bildirib.

44 yaşlı mütəxəssisin yetirməsi Niko Kitosaho komandanın bu vəziyyətə münasibətini belə ifadə edib: “Bu məsələni şərh edə bilmərik. Məşqçinin bizi tərk edəcəyini dünən öyrəndik. Hər şey qaydasındadır. Biz sadəcə işimizə və tullanışlara köklənmək istəyirik. Qəzetlərin bu barədə yazdığını bilirik, lakin oxumamağa çalışırıq. Diqqətimiz ən vacib məqamlardadır”.

Xatırladaq ki, Finlandiya Olimpiya Komitəsi spirtli içkidən sui-istifadə etdiyi üçün İqor Medvedi Olimpiya Oyunlarından kənarlaşdırıb.

Sloveniya vətəndaşı olan Medved 2024-cü ilin iyun ayından finlərin baş məşqçisi postunda çalışırdı. O, cari Milan və Kortina-d’Ampetso Oyunlarında komandanı qarışıq yarışlarda artıq altıncı yerə yüksəltməyi bacarmışdı. 2026-cı il Olimpiadası başa çatana qədər baş məşqçi vəzifəsini Lasse Moylanen icra edəcək.