AFFA İntizam Komitəsinin növbəti iclasında Premyer Liqa, əvəzedici komandaların çempionatı, ölkə kuboku və I liqada baş verən qayda pozuntuları ilə bağlı qərarlar qəbul edilib.
PFL-in məlumatına görə, Premyer Liqanın VII turunda “Sabah”la qarşılaşmada azarkeşlərinin “bayquşlar”ın futbolçusunu təhqir edən ifadələr işlətməsi “Neftçi”yə 5000 manat cərimə bahasına başa gəlib. Həmin oyunda sarı vərəqə limitini aşdığı üçün “Sabah” da 700 manat cərimələnib.
“İmişli” – “Qarabağ” matçından sonra meydana kənar şəxslərin daxil olması İmişli təmsilçisinə 2500 manat cərimə tətbiq edilməsi ilə nəticələnib. “Araz-Naxçıvan” isə “Kəpəz”lə oyunda tablo işləmədiyinə görə 2000 manat ödəyəcək.
Bundan başqa, əvəzedici komandaların çempionatının V turunda baş verən qayda pozuntularına görə bir neçə Premyer Liqa klubu ümumilikdə 1170 manat cərimələnib.
Ölkə kubokunun I təsnifat mərhələsinin oyunlarında yol verilən pozuntulara görə klublara ümumilikdə 650 manat cərimə tətbiq olunub.
I Liqada isə çempionatın IV turunun oyunlarında baş verən müxtəlif qayda pozuntularına görə bir neçə klub ümumilikdə 870 manat cərimələnib.