“Qarabağ”ın baş məşqçisi Qurban Qurbanov Avropa Liqasının I təsnifat mərhələsinin cavab matçı çərçivəsində İslandiyada keçiriləcək “Vestri” oyunu öncəsi fikirlərini bölüşüb. Bakıdakı ilk görüşdə qazanılan inamlı qələbəyə (3:0) baxmayaraq, təcrübəli mütəxəssis Reykyavikdəki qarşılaşmaya olduqca ciddi yanaşdıqlarını vurğulayıb.

Komandanın ümumi hazırlıq durumunu dəyərləndirən Qurbanov, rəqibin oyununu dərindən analiz etdiklərini bildirib: “Ümumilikdə, komanda oyuna tam hazırdır. İlk matçdan sonra rəqibi artıq daha yaxşı tanıyırıq və lazımi təhlillərimizi aparmışıq. İslandiyaya səfərimiz olduqca uzun və yorucu keçdi – demək olar ki, dünən bütün günü yolda olduq. Lakin bu çətinliyə baxmayaraq, futbolçularımın meydana maksimum konsentrasiya və yüksək motivasiya ilə çıxacağına inanıram”.

Reykyavikdəki hava şəraitinə toxunan baş məşqçi, soyuğun onların oyununa mənfi təsir etməyəcəyini qeyd edib: “Havanın soyuq olmasına baxmayaraq, bu temperatur futbol üçün olduqca əlverişlidir. Biz oynamağa hazırıq və meydanda intizamlı, əzmkar mübarizə nümayiş etdirəcəyik. Heyətdə müəyyən dəyişikliklərin olması istisna deyil. Start heyətini tam dəqiqləşdirmək üçün hələ qarşıda vaxtımız var”