Azərbaycan Premyer Liqasının XXXII turu “Sumqayıt”ın hücumçusu Aleksandr Ramalingom üçün yaddaqalan olub.

Peşəkar Futbol Liqasının rəsmi məlumatına görə, təcrübəli forvard “Zirə” ilə qarşılaşmada (1:2) komandasının yeganə qoluna imza atmaqla ölkə çempionatındakı qollarının sayını 25-ə çatdırıb. Madaqaskarlı legioner bu yubiley sərhədini cəmi 63 matçda keçməyi bacarıb.

İki fərqli klubda fərqlənən hücumçunun qol performansı diqqət çəkir: o, “Səbail”in heyətində meydana çıxdığı 35 oyunda 15 dəfə rəqib qapıçıları məyus edibsə, “Sumqayıt”da şans qazandığı 28 qarşılaşmada 10 qola imza atıb.