Futbol üzrə Azərbaycan Kubokunda qalibin adına aydınlıq gələcək final matçının hakim təyinatları açıqlanıb. Peşəkar Futbol Liqasının (PFL) yaydığı məlumata görə, “Sabah” və “Zirə” komandaları arasında keçiriləcək həlledici qarşılaşma FIFA referisi Elçin Məsiyevə tapşırılıb.
Meydanda ona Elşad Abdullayev və Pərvin Talıbov yan xətt hakimləri qismində assistentlik edəcəklər. Görüşün dördüncü hakimi funksiyasını Əli Əliyev yerinə yetirəcək. Gülnurə Əkbərzadə isə ehtiyat köməkçi hakim kimi texniki zonada yer alacaq.
Görüşün gedişatına videotəkrar sistemindən nəzarət edəcək hakimlər də bəllidir. Final matçının VAR hakimi Tural Qurbanov, onun köməkçisi (AVAR) isə Rəhman İmami olacaq.