Premyer Liqanın 27-ci turunda evdə “Şamaxı” ilə qolsuz bərabərliyə razılaşan “Qarabağ”ın baş məşqçisi Qurban Qurbanov matçdan sonra mətbuat konfransında iştirak edib. Təcrübəli mütəxəssis itirilmiş xalları, çempionluq şanslarını və futbolçularına gələn transfer təkliflərinin komandaya təsirini dəyərləndirib.

Qurban Qurbanov ilk növbədə azarkeşlərə təşəkkür edərək oyunun gedişatına toxunub: “Futbolçularıma və bizi tək qoymayan azarkeşlərimizə minnətdaram. Komanda sona qədər qələbə üçün döyüşsə də, istədiyimiz nəticəni ala bilmədik. Futbolda belə hallar olur. Ayxan Abbasova və “Şamaxı”ya gələcək oyunlarda uğurlar arzulayıram”.

Turnir cədvəlindəki vəziyyəti real dəyərləndirən baş məşqçi, liderlə aradakı fərqin böyüdüyünü etiraf edib: “Artıq kifayət qədər xal itirmişik. Lider “Sabah”la aradakı 10 xallıq fərq az deyil və bu, komandaya psixoloji təsir edir. Lakin bu o demək deyil ki, biz çempionatdan əl çəkib yalnız ölkə kubokuna köklənəcəyik. Qarşıda bizi “Sabah” və “Neftçi” kimi rəqiblərlə maraqlı qarşılaşmalar gözləyir. Həmin oyunlara daha pozitiv hazırlaşmalı və sona qədər azarkeşlərimizə yaxşı futbol nümayiş etdirməliyik”.

Növbəti mövsüm üçün planlardan danışan çalışdırıcı, heyətin gücləndirilməsinin vacibliyini vurğulayıb: “Hər şey həmişə istədiyimiz kimi getmir. Alınmayan mövsümlər də olur. Amma müəyyən köklü dəyişikliklər etmək niyyətindəyik. Komandaya yeni qan, yeni futbolçular lazımdır”.

Zubirin Qətərə mümkün transferi ilə bağlı sualı cavablandıran Qurbanov, bu barədə məlumatı olmadığını bildirsə də, oyunçulara gələn təkliflərin konsentrasiyanı pozduğunu gizlətməyib: “Zubirin gedişi ilə bağlı məndə məlumat yoxdur. Lakin reallıq budur ki, futbolçularımızın 70-80 faizinə müxtəlif təkliflər gəlib. Bu, futbolun qanunudur. Onlar uğurlu mövsüm keçirdikləri üçün diqqət mərkəzindədirlər. Təəssüf ki, bu təkliflər oyunçuların düşüncəsinə 100 faiz təsir edib. Xüsusilə heyətə yeni qoşulanların bu cür xəbərlərdən təsirlənməsi bizim üçün mənfi nüansdır”.