Almaniyanın Kienbaum şəhərində yeniyetmə boksçular arasında keçirilən U-17 Avropa çempionatında millimiz uğurla çıxış edib. 29 ölkədən 382 idmançının qatıldığı mötəbər turnirdə boksçularımız ümumilikdə 4 medal qazanaraq ölkəmizi layiqincə təmsil ediblər.

Ölkəmizin yeniyetmə dəri əlcək ustaları final mərhələsində yüksək əzmkarlıq nümayiş etdiriblər. Xüsusilə MDB Oyunlarında qazandıqları uğuru bu turnirdə də davam etdirən iki idmançımız Avropa çempionu adını qazanıb.

 Turnirin favoritlərindən sayılan Gülər Hüseynova (48 kq) finalda Türkiyə təmsilçisi Asmin Cabasla qarşılaşıb. Rəqibinə heç bir şans verməyən boksçumuz 5:0 (29:26, 29:26, 30:25, 30:25, 28:27) hesabı ilə parlaq qələbə qazanaraq qızıl medala sahib olub.

Komanda yoldaşının uğurunu təkrarlayan Qardaş Rəhimov (46 kq) rumıniyalı Birham-Pasa İuseim ilə gərgin mübarizə aparıb. Görüşün sonunda hakimlərin qərarı ilə 3:2 (29:28, 30:27, 30:27, 27:30, 28:29) hesablı qələbə qazanan boksçumuz fəxri kürsünün ən yüksək pilləsinə qalxıb.

Millimizin digər iki üzvü – Şahin Aslanov (60 kq) və Şükar Əliyev (75 kq) də finala qədər inamla irəliləyiblər. Həlledici görüşlərdə məğlub olan boksçularımız çempionatı gümüş medalla başa vuraraq aktivimizə növbəti xalları yazdırıblar.

Yeri gəlmişkən, bu nəticə ilə boksçularımız Avropanın ən güclü komandaları sırasında yer aldıqlarını bir daha sübut ediblər. Qazanılan 2 qızıl və 2 gümüş medal ölkəmizdə gənc boksçuların inkişafının bariz nümunəsidir.