“Qalatasaray”ın hücumçusu Viktor Osimhen İstanbula keçidi ilə bağlı xatirələrini bölüşüb. Xatırladaq ki, o, 2024-cü ilin sentyabrında “Napoli”dən transfer olunub.

“The Players’ Tribune” nəşrinə danışan futbolçu bunları deyib: “Neapoldan ayrılarkən bir çoxları mənə Türkiyəyə getməməyi, ağlımı itirdiyimi deyirdilər. Keçmiş agentim bunun qeyri-ağıllı bir addım olduğunu bildirdi. Amma mən həmişə ürəyimin səsinə qulaq asıram. “Qalatasaray”da oynamaq istəyirdim. Mən ehtiras baxımından dünyanın ən yaxşı üç klubundan birinə keçmək istəyirdim”.

Osimhen transferdən öncə baş məşqçi ilə olan söhbətini də yada salıb:  “İmza atmazdan əvvəl baş məşqçi Okan Burukla telefonda danışdıq. O mənə dedi: “sənə bunu demək üçün buradayam: həm bir insan, həm bir məşqçi, həm də bir ata kimi səni öz klubumda görmək istəyirəm. Bilirəm ki, azarkeşlər səni çox sevəcəklər. Hətta işlərin çətin getdiyi anlarda belə, bu klub səni dəstəkləyəcək”.