“Neftçi”nin baş məşqçisi Yuri Vernidub İranın Naxçıvan hava limanına endirdiyi dron zərbələri və regiondakı gərgin siyasi vəziyyət barədə Ukrayna mətbuatına danışıb. O, son günlər baş verən hadisələri şərh edərkən dünyadakı ümumi vəziyyətdən narahatlığını ifadə edib və Sport.ua saytına müsahibəsində Naxçıvana edilən hücum və Bakıdakı mövcud durum barədə danışıb.

Hücumun təfərrüatlarına toxunan baş məşqçi, hadisədən xəbərdar olduğunu bildirdib: “Bilirəm ki, İran sərhədinə yaxın yerləşən Naxçıvan şəhərinə hücum olub. Deyəsən, iki dron hava limanına zərbə endirib. Şükürlər olsun ki, insanlar arasında tələfat yoxdur – yalnız yaxınlıqdakı binalara ziyan dəyib”.

Vernidub təkcə regional deyil, həm də qlobal miqyasda artan gərginliyi “Üçüncü Dünya Müharibəsi”nin siqnalları kimi qiymətləndirib: “Azərbaycan hakimiyyəti dərhal etiraz notası ilə öz mövqeyini bildirdi. Dünyada nələrin baş verdiyini görmək qorxuludur: Dubay, Əbu-Dabi və Yaxın Şərqin digər böyük şəhərləri əziyyət çəkir. Elə təəssürat yaranır ki, Üçüncü Dünya Müharibəsi yaxınlaşır”.

Şəhərdəki təhlükəsizlik tədbirləri və gündəlik həyat barədə danışan mütəxəssis, hazırda diqqətini tamamilə futbola yönəltdiyini vurğulayıb: “Təhlükəsizliklə bağlı müvafiq tədbirlər, əlbəttə ki, görülüb. Lakin hələlik hansısa detalları bilmirəm, çünki səhərdən axşama qədər klubun bazasındayam – daim futbol işləri ilə məşğul oluram. Onu deyə bilərəm ki, hazırda Bakıda sakitlikdir”.