BƏƏ-nin ikinci liqasında çıxış edən “Əl-İttifaq” klubunun hücumçusu Mario Balotelli “Dubay Siti” ilə matçda irqçi təhqirlərlə üzləşdiyini açıqlayıb.

İtaliyalı ulduz futbolçu başına gələnlərlə bağlı “Instagram”hesabında paylaşım edib:“Mən həmişə irqçiliyin bütün formalarını pisləmişəm, lakin burada belə bir halla qarşılaşacağımı heç gözləmirdim. Ümid edirəm ki, gələcəkdə bu cür halların qarşısını almaq üçün ciddi tədbirlər görüləcək. Oyun zamanı dəfələrlə irqçi təhqirlərə məruz qaldım. Mənə tərəf “meymun səsləri” çıxarır və “get banan ye” deyirdilər. İrqçiliyə nə futbolda, nə də cəmiyyətdə yer yoxdur. Bu cür davranışı normallaşdırmaq, ona bəraət qazandırmaq və ya görməzdən gəlmək olmaz. Mən bu barədə təkcə özüm üçün deyil, oxşar problemlə üzləşən hər bir oyunçu adına danışıram ki, diqqəti bu problemə çəkim. Artıq kifayətdir!”.

Qeyd edək ki, 35 yaşlı forvard karyerası ərzində “İnter”, “Milan”, “Mançester Siti”, “Liverpul” kimi nəhəng klubların və İtaliya millisinin formasını geyinib.