Premyer Liqada mövsümün sonu yaxınlaşdıqca transfer bazarında hərəkətlilik pik həddə çatır. Hazırda diqqət mərkəzində olan əsas simalardan biri “Şamaxı”nın gənc və istedadlı yarımmüdafiəçisi Alfons Msanqadır. Tanzaniya millisinin üzvünün gələcək taleyi ətrafında müzakirələr getdikcə qızışır.
22 yaşlı futbolçunun “Şamaxı”dakı stabil çıxışı çempionatın iddialı klublarının diqqətindən yayınmayıb. Əldə olunan məlumata görə, “Turan-Tovuz” və “Zirə” yarımmüdafiəçini transfer siyahısına daxil edib. Hər iki klub orta xətti gücləndirmək üçün tanzaniyalı oyunçunu heyətinə qatmaqda israrlıdır.
Lakin “Şamaxı” rəhbərliyi aparıcı futbolçusunu asanlıqla əldən vermək niyyətində deyil. Klub rəsmi şəkildə Msanqaya yeni müqavilə təklif edib və əməkdaşlığı davam etdirmək istədiyini bildirib.
Hazırda tərəflər arasında yekun razılıq əldə olunmayıb. Mövcud müqaviləsi cari mövsümün sonunda başa çatan gənc legionerin hansı qərarı verəcəyi – “astronomlar”la yola davam edəcəyi, yoxsa yeni kluba keçəcəyi maraqla gözlənilir.