“Araz-Naxçıvan”dan daha bir böhran siqnalı

Bu axşam keçirilən daha iki oyunla ölkə kubokunun 1/4 finalına çıxan qalan iki komanda da məlum olub. “Sumqayıt”ın aşağı divizion klubu “Difai” üzərində asan qələbə qazanacağı gözlənilsə də, tam əksinə olub. Sumqayıtlılar üstünlüyə baxmayaraq yalnız son 15 dəqiqədə vəziyyəti dəyişə bilib. 84-cü dəqiqədə rəqibin azlıqda qalması ilə rahatlayan qonaqlar uzatmalarda daha bir qol vuraraq qələbəni təmin edib.

“Araz-Naxçıvan” isə “Kəpəz”in ciddi müqaviməti ilə üzləşdi. Oyunun əsas vaxtı qolsuz başa çatıb. Bununla belə hər iki tərəf qol vura bilərdi. Gəncə komandası azı 3 dəfə dirəyi titrətdi. Əlavə vaxtın bitməsinə 5 dəqiqə qalmış Ryonosuke Ohori baxımlı qolla “Kəpəz”i hesabda irəli çıxardı. Naxçıvanlıların praktiki olaraq oyunun taleyini dəyişməyə vaxtı qalmadı. Bununla da, ciddi eniş yaşayan Elmar Baxşıyevin komandası Kubok yarışlarından kənarda qaldı. Azər Bağırov isə gəlişindən sonra “Kəpəz”i yüksəlişə dartdığını bir daha göstərdi. Maraqlıdır ki, bu komandalar ölkə çempionatının növbəti turunda da üz-üzə gələcək.

Azərbaycan Kuboku, 1/8 final

“Araz-Naxçıvan” – “Kəpəz” 0:1 – əlavə vaxtda
Mərdəkan qəsəbəsi, “Liv Bona Dea Arena” stadionu
Baş hakim: Cavid Cəlilov
Qol: R. Ohori, 115.

“Diafi” – “Sumqayıt” 1:3
“Mehdi Hüseynzadə” adına Sumqayıt şəhər stadionu
Baş hakim: Nicat İsmayıllı
Qollar: K. Qardaşlı, 68 – R. Vaskes, 9; 75-p. A. Ramalinqom, 90+3.

1/4 finalda bu cütlər qarşılaşacaq.

“Şamaxı” – “Qarabağ”
“Sabah” – “Qəbələ”
“Turan-Tovuz” – “Kəpəz”
“Sumqayıt” – “Zirə”