Rumıniya yığmasının baş məşqçisi Mirça Luçesku Slovakiya ilə keçiriləcək yoldaşlıq oyunu öncəsi məşq zamanı qəfil pisləşib. 80 yaşlı mütəxəssisə təcili tibbi yardım göstərilib və o, dərhal xəstəxanaya çatdırılıb.

Məlumata görə, təcrübəli mütəxəssis texniki toplantı zamanı huşunu itirib. Rumıniya Futbol Federasiyasının (FRF) nümayəndələri və yerli mətbuat (GSP) hadisənin ürəktutma ehtimalı ilə bağlı olduğunu bildirir. Federasiyanın rəsmi bəyanatında deyilir: “Slovakiya səfəri öncəsi son məşq prosesində baş məşqçi Mirça Luçeskunun vəziyyəti qəfil pisləşib. Milli komandanın tibbi heyəti tərəfindən yerindəcə ilkin yardım göstərilib. Çağırış əsasında təlim-məşq bazasına gələn iki təcili yardım briqadasının operativ müdaxiləsi nəticəsində məşqçinin vəziyyətini stabilləşdirmək mümkün olub”.

Hazırda Luçeskunun vəziyyətinin stabil olduğu bildirilsə də, tibbi protokollara uyğun olaraq o, paytaxt xəstəxanalarından birində ciddi müayinə altına alınıb. Federasiya hər hansı bir riski istisna etmək üçün mütəxəssisin həkim nəzarətində qalacağını vurğulayıb.

Martın 31-nə planlaşdırılan yoldaşlıq oyunu üçün Rumıniya millisi bu axşam Slovakiyaya yola düşür. Mövcud vəziyyəti nəzərə alaraq, 80 yaşlı baş məşqçinin komanda ilə birlikdə səfərə çıxmayacağı dəqiqləşib.Qeyd edək ki, “Şaxtyor”, “Zenit”, “İnter” kimi nəhəng klubların keçmiş çalışdırıcısı bu ilin yanvar ayında da qrip fəsadlarından sonra yaranan ürək problemləri səbəbindən təcili hospitalizasiya olunmuşdu.