Şimali Amerika Futbol Liqasında (MLS) geniş rezonans doğuran mərc araşdırması yekunlaşıb. Liqa rəhbərliyi, qaydaları ciddi şəkildə pozaraq öz komandalarının oyunlarına mərc etdikləri təsbit edilən Derrik Cons və Yav Yeboaya qarşı ən ağır sanksiyanı tətbiq edib: hər iki oyunçu futboldan ömürlük kənarlaşdırılıb.

MLS tərəfindən aparılan genişmiqyaslı təhqiqat nəticəsində futbolçuların çoxsaylı matçlara mərc qoyduqları üzə çıxıb. Araşdırmada xüsusilə “Columbus Kryu” və “New York Red Bulls” arasındakı qarşılaşma diqqət mərkəzində olub.

Müəyyən edilib ki, Derrik Consun həmin matçda sarı vərəqə alacağına dair qabaqcadan mərc edilib.  Yeboa və Consun bu qanunsuz qazanc sxemində əlbir fəaliyyət göstərdikləri sübuta yetirilib.

MLS-in rəsmi bəyanatında bildirilir ki, detallı yoxlamalar zamanı bu mərclərin oyunların yekun nəticəsinə birbaşa təsir etdiyinə dair konkret sübut tapılmayıb. Lakin idmanın dürüstlük prinsiplərini və nizam-intizam qaydalarını qorumaq məqsədilə liqa rəhbərliyi heç bir güzəştə getməyərək ən sərt cəzanı tətbiq edib.