Premyer Liqada mövsümün ən böyük intriqalarından birinə Gəncədə son qoyuldu. ‘Turan Tovuz’un qapısında ‘keçilməz sədd’ quran Sergey Samokun aylardır davam edən möhtəşəm seriyası XXIV turda qırıldı. Rusiyalı qolkiper nəinki cari mövsümdə ilk qolunu buraxdı, həm də adını ölkə çempionatlarının tarixinə yazıb.
Matçın 55-ci dəqiqəsində Rəhman Hacıyevin vurduğu qol Samokun uzun müddətdir toxunulmaz qalan qapısının “sehrini” pozub. Samok bundan əvvəl ötən çempionatın son 2 turunda və cari mövsümün startından etibarən ardıcıl 6 oyunda qapısını qolsuz saxlamağı bacarmışdı.
Onun sonuncu dəfə nə vaxt qol buraxdığını xatırlamaq üçün təxminən 10 ay geriyə boylanmaq lazımdır: 2024/25 mövsümünün XXXIV turunda, ötən il mayın 10-da “Neftçi” ilə keçirilən ev oyununun (1:2) 32-ci dəqiqəsində Dembo Darbo onun qapısına yol tapmışdı.
Hacıyevin qoluna qədər Sergey Samok tam 812 dəqiqə qapısını toxunulmaz saxlayıb. Bu göstərici ilə o, Azərbaycan çempionatlarının yüksək dəstə tarixində 800 dəqiqəlik həddi aşan 9-cu qapıçı kimi adını tarixə yazdırıb.
Azərbaycan çempionatları tarixində ən uzunmüddətli “quru seriya” müəlliflərinin siyahısı aşağıdakı kimidir:
Qolkiper Klub Dəqiqə
1 Nizami Sadıqov “Turan” 1106
2 Xalidu Sissoko “Bakı” 985
3 Xalidu Sissoko “Bakı” 971
4 Camaləddin Əliyev “Qarabağ” 958
5 Pavel Doroşev “Qəbələ” 952
6 Elxan Həsənov “Neftçi” 943
7 Dmitri Bezotosnı “Qəbələ” 915
8 Boyan Pavloviç “Qarabağ” 828
9 Sergey Samok “Turan-Tovuz” 812