“Sabah”ın U-18 komandası Bosniya və Herseqovinanın Laktaşi şəhərində keçirilən Gənclər Çempionlar Liqasında (YCL) çıxışını başa vurub. Turnirin son günündə 7-8-ci yerlər uğrunda mübarizə aparan “gənc bayquşlar” Türkiyənin köklü klublarından olan “Tofaş” ilə üz-üzə gəliblər.
Görüşün ilk dəqiqələrindən üstünlüyü ələ alan təmsilçimiz, oyunun sonuna qədər tempini düşürməyərək rəqibini böyük hesabla məğlub edib. Matçın dörddəbir göstəriciləri “Sabah”ın tam dominantlığını əks etdirir: Sabah U-18 – Tofaş U-18 86:60 (24:18, 24:12, 21:16, 17:14).
“Sabah” bu mötəbər turnirdə gərgin və maraqlı yol qət edib. Qrup mərhələsində təmsilçimiz Almaniyanın “Porşe BBA Lüdviqsburq” klubuna qalib gəlsə də (72:61), Bosniya və Herseqovinanın “İgokea” kollektivinə (58:88) məğlub olub.
5-8-ci yerlər uğrunda görüşdə Bosniyanın digər təmsilçisi “Borats” ilə qarşılaşan basketbolçularımız, mübariz oyunda rəqibinə 60:67 hesabı ilə uduzublar.
Yekun olaraq, “Tofaş” üzərindəki parlaq qələbə ilə “Sabah” U-18 komandası turniri 7-ci pillədə tamamlayıb.