“Sabah” basketbol klubu Çempionlar Liqasının qrup mərhələsinin sonuncu turunda Almaniyanın “Alba” komandası ilə qarşılaşıb. Rimas Kurtinaitisin yetirmələrinin növbəti mərhələyə yüksəlməsi üçün mütləq qələbə qazanmalı və paralel keçirilən matçda Çexiyanın “Nimburk” klubunun Fransada “Şalon Son”a uduzmasını gözləməli idi. Fransızlar rəqibini 97:84 hesabı ilə məğlub edərək “Sabah”a lazımi imkanı yaratsalar da, təmsilçimiz öz vəzifəsinin öhdəsindən gələ bilməyib. İlk iki hissədə “Sabah” rəqibi ilə baş-başa mübarizə aparıb və hətta fasiləyə üstün yollanıb – 42:46. Ancaq üçüncü hissədə müdafiə xəttində yol verdiyimiz boşluqlar almanlara üstünlük qazandırdı və rəqib bu fürsətləri qaçırmayaraq qələbəni təmin etdi. Gərgin keçən görüş “Alba”nın 106:82 (25:24, 17:22, 33:12, 31:24) hesablı qələbəsi ilə başa çatıb. Bununla da “Sabah” Çempionlar Liqasında mübarizəni dayandırıb.

B qrupu
1. Alba 6 5 1 549:483 11
1. Şalon Saone 6 5 1 539:513 11
3. Nimburk 6 1 5 512:546 7
4. Sabah 6 1 5 486:544 7