İran futbolunun ən parlaq simalarından biri, yığmanın hücum xəttinin lideri Sərdar Azmun ciddi problemlərlə üz-üzədir. Ölkədə baş verən hadisələrə münasibəti və hökumət əleyhinə paylaşımları səbəbindən ulduz futbolçunun həm karyerası, həm də şəxsi mülkiyyəti təhlükə altına düşüb.

İranın yarım-rəsmi xəbər agentliklərinin yaydığı məlumata görə, ədliyyə orqanları hökuməti açıq şəkildə tənqid edən 16 nəfərlik xüsusi siyahı hazırlayıb. Bu siyahıda yer alan əsas adlardan biri də məhz Azmundur. Futbolçunun etiraz aksiyalarına dəstək verməsi rəsmi Tehranın kəskin reaksiyasına səbəb olub. İran ədliyyəsi bəyan edib ki, dövlət əleyhinə çıxış edən məşhur şəxslərin ölkə daxilindəki bütün daşınmaz əmlakı və aktivləri müsadirə oluna bilər.

Azmunun siyasi mövqeyi onun yaşıl meydanlardakı taleyinə də təsirsiz ötüşməyib. 31 yaşlı təcrübəli forvard Dünya Çempionatına hazırlıq çərçivəsində keçirilən son oyunların heyətinə daxil edilməyib. İdman dairələrində gəzən şayiələrə görə, ulduz futbolçunun qarşıdakı mötəbər turnirdə iştirak şansı minimuma enib.

Milli formanı geyindiyi 91 matçda rəqib qapılarına 57 yol tapan Azmun, İran yığmasının tarix boyu ən çox qol vuran ikinci futbolçusu statusunu daşıyır.

Hazırda BƏƏ-nin “Şhabab Əl-Əhli” klubunda çıxış edən Azmun, daha əvvəl “Roma”, “Bayer” və “Zenit” klublarında top qovub.

Azmunun yoxluğu milli komandanın nəticələrinə də dərhal təsir edib. Təhlükəsizlik səbəbindən İordaniyadan Türkiyəyə (Antalya) köçürülən yoldaşlıq görüşündə İran millisi Nigeriyaya 2:1 hesabı ilə məğlub olub. Hücum xəttindəki kəskinlik itkisi və komanda daxilindəki mənəvi gərginlik idman mediasının diqqətindən yayınmayıb.