ABŞ prezidenti Donald Tramp Səudiyyə Ərəbistanı şahzadəsi Məhəmməd bin Salmanın şərəfinə şam yeməyi təşkil edib. Tədbirdə biznes dünyasının aparıcı simalarıyla yanaşı, FİFA prezidenti Canni İnfantino və Kriştiano Ronaldoda dəvət olunub. Tramp Kriştiano Ronaldoya xüsusi münasibət göstərib. GOAL-ın məlumatına görə, “Əl-Nəsr”in portuqaliyalı ulduzu qlobal biznes liderləri ilə yanaşı, fəxri qonaqlar arasında əyləşib. Çıxışın zamanı Ronaldodan söz açan Tramp zarafatından qalmayıb və futbolçu ilə görüşməsi onu kiçik oğlu Barronun gözündə daha da ucaldacağını deyib: “Ronaldo dünyanın ən böyük futbolçusudur. Bilirsiniz, oğlum onun fanatıdır və o, bu gün bizimlədir. Düşünürəm ki, indi oğlum atasına daha çox hörmət edəcək”.
Mənbənin məlumatına görə, Ronaldonun nümayəndə heyətinin arasında olması onun Səudiyyə Ərəbistanının beynəlxalq idman və diplomatik təşəbbüslərinin ictimai siması olmasından xəbər verir. Ronaldo tədbirə nişanlısı Corcina Rodrigez ilə gəlib və onlar daha sonra İlon Mask və İnfantino ilə selfi çəkdiriblər.
