“Ferentsvaroş”u keçərək Çempionlar Liqasının qrup mərhələsinə çıxan “Qarabağ”ın baş maşqçisi Qurban Qurbanov oyunsonrası mətbuat konfransında gərgin oyun nəticəsində Avropanın mötəbər turnirinə vəsiqə qazandıqlarını bildirdi. O, futbolçularını böyük oyunlarda iştirak edəcəklərinə görə təbrik etdi. “Oyuna gəlincə, gərgin matç keçdi. Bu gün stadion sanki tam başqa idi. Bəlkə də, çoxdan bu atmosferi görmürdük. Biz nə qədər gərgin idiksə, onlar da elə idi. Bu nəticəni ən çox haqq edənlərdən biri də onlardır. Hər kəsə təşəkkür edirəm”.

Qurbanov oyunçulardan soyuqqanlı olmağı istədiyini bildirdi. “İldən-ilə hamımız dəyişirik, yaşam dəyişir. O cümlədən sevimli peşəmiz futbol dəyişir. Sadəcə 8 ildən sonra o turnirə qatılmaq… Futbolun dəyişən tərəflərini xırdalasam, böyük problemlər ola bilər. Bəzən xarakter, bəzən birlik böyük uğura gətirib çıxarır. Öz həyatımızda nə dəyişirsə, işdə də onlar olur”.

Qurbanov Çempionlar Liqasındakı hədəflər barədə suala da cavab verib. “Hədəf Liqaya yüksəlmək idi. Sonrasına baxacağıq. Belə nailiyyətlər ölkə futbolunu sevdirir, futbolçuları böyüdür. Hər futbolçunun arzusu belə turnirlərdə iştirak etməkdir. Edəcəklərsə, böyük təcrübə qazanacaqlar. Digər tərəfdən görək, hansı klublar düşür. Fanatlar böyük klubları Bakıda görəcək. Rəhbərlik tərəfindən də futbola diqqət, maraq artacaq. Böyük klubları, futbolçuları canlı görəndə fərqli emosiyalar yaranır”.