Premyer Liqanın 19-cu turu çərçivəsində keçirilən “İmişli” – “Kəpəz” qarşılaşması qolsuz bərabərliklə yekunlaşıb. Azarkeşlər meydanda qol görməsələr də, oyunsonrası mətbuat konfransı hər iki komandanın baş məşqçisinin maraqlı açıqlamaları və toxunduqları vacib məqamlarla yadda qalıb.

Kaşkilya: “Əsas məqsəd 6 xallıq fərqi qorumaq idi”

“İmişli”nin baş məşqçisi Jorje Kaşkilya nəticəni qənaətbəxş hesab edib. Komandasının qələbə üçün meydana çıxdığını vurğulayan mütəxəssis, rəqibin oyun taktikası və meydançanın vəziyyətinin buna mane olduğunu bildirib.

Kaşkilya rəqibin xırda follarla oyunun tempini aşağı saldığını, ikinci hissədə isə ot örtüyünün daha da pisləşməsinin hücumların kəsərini azaltdığını qeyd edib. Baş məşqçi əsas hədəflərinin “Kəpəz”lə aradakı 6 xallıq fərqi qorumaq olduğunu və buna nail olduqlarını deyib.

Portuqaliyalı mütəxəssis heyətlə bağlı məsələlərə də toxunub. O, yeni transfer Dioqu Kardozunun adaptasiya üçün zamana ehtiyacı olduğunu, boyun nahiyəsindən zədə alan Azər Salahlının vəziyyətinin isə tibbi müayinədən sonra dəqiqləşəcəyini söyləyib.

Bağırov: “Meydançanın vəziyyəti bərbad idi”

“Kəpəz”in sükanı arxasında olan Azər Bağırov isə həm oyunun gedişatından, həm də komandanın üzləşdiyi xoşagəlməz hadisədən danışıb. Bağırov 4 gün əvvəl keçirilən kubok oyunundan sonra komandanın bərpa olunmasının çətinliyini vurğulayıb. Meydançanın bərbad vəziyyətdə olmasına rəğmən, qarşılaşmanın yeni zədələr olmadan başa çatması məşqçi üçün əsas təsəlli olub.

Futbolçunun bıçaqlanması şoku Konfransın ən sarsıdıcı mövzusu isə bıçaqlanan futbolçu Veysal Rzayevin vəziyyəti olub. Bağırov futbolçunun hazırda palatada müalicə olunduğunu bildirib: “Futbolçular öz evlərində yaşayırlar və asudə vaxtları olur. Gəncə kiçik şəhərdir, biz onları daim nəzarətdə saxlayırıq. Hadisə ilə bağlı klub rəhbərliyi ilə müzakirəmiz olacaq və lazımi tədbirlər görüləcək”.