“Kayrat” Cempionlar liqasının pley-off mərhələsində qitənin köklü klublarından olan “Seltik” səddini aşmaqla sensasiyaya imza atdı. Komandanın bu uğurunda böyük pay sahibi olan Rafael Urazbaxtin Çempionlar Liqasının əsas mərhələsində adı iştirak ərizəsinə düşən ilk qazaxıstanlı məşqçi olacaq. Maraqlıdır ki, Urazbaxtin məşqçi lisenziyası alana kimi ayaqqabı satıcısı işləyib. 

Onun karyerası 1990-cı illərin əfsanəvi italyan məşqçisi Arriqo Sakkini xatırladır. “Milan”la tarixin ən güclü komandasını yaradaraq zirvələri fəth edən Sakki məşqçilik karyerasına başlayana qədər ayaqqabı alveri ilə məşğul olub. Futbolçu karyerasını aşağı liqalarda başa vurduqdan sonra Sakki atasının şirkətində – Forlì şəhərindəyerləşən kiçik ayaqqabı fabrikində və mağazasında işləyib. Sakki özü müsahibələrində dəfələrlə zarafatla deyib: “Mənim futbolçu kimi karyeram yox idi, mən ayaqqabı satan idim. İnsanlar soruşurdular: bu adam necə olur ki, “Milan”ı çalışdırır?”  O, günün bir hissəsində satışla məşğul olur, digər hissəsində isə həvəskar komandaları çalışdırırdı. Futbol taktikasına marağı və fərqli baxışı sayəsində yavaş-yavaş aşağı liqalardan yüksəldi.