“Qarabağ”ın Çempionlar Liqasının əsas mərhələsindəki sonuncu rəqibi “Liverpul”, heç-heçə “lənəti”ni qırmaq ümidi ilə Bornmuta yollanmışdı. Premyer Liqada ardıcıl dörd oyundur meydanı bir xalla tərk edən “qırmızılar”ın son qələbəsi 27 dekabr tarixinə təsadüf edirdi. Baş məşqçi Arne Slot start heyətində Afrika Kubokundan yeni qayıtmış Məhəmməd Salahla yanaşı, Qakpo, Soboslai və Virtsə də şans vermişdi. Lakin ilk hissənin qəhrəmanı misirli ulduz deyil, meydan sahiblərinin hücum xətti oldu.
“Bornmut” yarım-fürsətlərı qola çevirərək favorit rəqibini şoka saldı. Əslində isə “Liverpul”u sarsıdan ilk zərbə öz kapitanlarından gəldi. Vircil van Dayk, Hillin adi ötürməsini uzaqlaşdırmaq istəyərkən ayağı topun üstündən keçdi. Skott xəttin üzərində topa yetişərək ötürməni Evanilsona ünvanladı, braziliyalı hücumçu isə boş qapını dəqiq nişan aldı – 1:0.
Cəmi beş dəqiqə sonra Hillin növbəti ötürməsi qolla nəticələndi. Onun bir pasla yarıb keçdiyi “Liverpul” müdafiəsində Ximenes hamını qabaqlayaraq Alissonu məyus etdi – 2:0. Topa nəzarət etməsinə baxmayaraq, “Liverpul” intriqanı yalnız ilk hissəyə əlavə olunmuş vaxtda bərpa edə bildi. Soboslainin künc zərbəsindən sonra van Dayk yaxın dirəkdə özünü bağışlatdı – 2:1.
İkinci hissədə Arne Slot oyuna müdaxilə edərək Robertson, Eketike və Consu meydana buraxdı. Lakin “Bornmut”un nizamlı müdafiəsi və “Liverpul”un hücumda sürət çatışmazlığı bərabərlik qolunu gecikdirirdi. Yalnız 80-ci dəqiqədə Nqumoanın fərdi reydi nəticəsində qazanılan cərimə zərbəsi hesaba tarazlıq gətirdi. Salahın toxunuşundan sonra Dominik Soboslai “canlı səddi” dəlib keçən güclü zərbə ilə dublunu rəsmiləşdirdi – 2:2.
Matçın son dəqiqələri əsl trillerə çevrildi. Hər iki tərəf qələbə topunu vura bilərdi: Evanilsonun boşa verdiyi fürsət və Virtsin dəf edilən zərbəsi azarkeşləri həyacanda saxladı. “Vitaliti” stadionunda hamı beşinci ardıcıl heç-heçəni gözlədiyi anda, 90+5-ci dəqiqədə səhnəyə Amin Adli çıxdı. Hillin autdan ötürdüyü top “Liverpul”un cərimə meydançasında xaos yaratdı. Qapıçı Alissonun çıxışda səhvini bağışlamayan Adli, dirəkdən dönən topu tora qovuşduraraq “Bornmut”a qələbə qazandırdı.