Ölkə çempionu “Qarabağ”ın Türkiyənin Antalya şəhərində keçirəcəyi qış təlim-məşq toplanışı çərçivəsində qarşılaşacağı rəqiblər məlum olub. Ağdam təmsilçisi hazırlıq prosesində iki yoxlama görüşü keçirməyi planlaşdırır. Klubun mətbuat xidmətindən verilən məlumata görə, “köhlən atlar” yanvarın 10-dan 17-dək Belek bölgəsində məskunlaşacaq. Hazırlıq çərçivəsində baş tutacaq oyunların cədvəli belədir. Ağdam klubu yanvarın 12-də “Neftçi” (Fərqanə, Özbəkistan), 4 gün sonra isə “Zaqlebiye” (Lyubin, Polşa) ilə qarşılaşacaq. Bu yoxlama oyunları “Qarabağ” üçün yeni ildəki rəsmi matçlara hazırlıq xarakteri daşıyır. Qeyd edək ki, Qurban Qurbanovun yetirmələri ilin ilk rəsmi oyununa yanvarın 21-də çıxacaqlar. Komandamız UEFA Çempionlar Liqasının liqa mərhələsi çərçivəsində doğma meydanda Almaniyanın iddialı “Ayntraxt” (Frankfurt) klubunu qəbul edəcək.
