UEFA Çempionlar Liqasının əsas mərhələsinin “Qarabağ”la “Ayaks” arasında keçiriləcək VI turun oyununu idarə edəcək hakimlər briqadası açıqlanıb. Qarşılaşma Sloveniyadan olan hakimlər briqadasına tapşırılıb. Görüşün baş hakimi Rade Obrenoviçə Yure Praprotniklə Qreqa Kordej kömək edəcək. Dördüncü hakim funksiyasını isə Mateo Tozan yerinə yetirəcək. VAR-da Matey Yug, AVAR-da Alen Boroşak olacaq.

Xatırladaq ki, sloveniyalı referi “Qarabağ” klubu üçün tanış simadır. Belə ki, o, iki dəfə “köhlən attlar”ın oyunlarında hakimlik edib. Obrenoviç 2021-ci ildə Konfrans Lqasının təsnifat mərhələsinin Şotlandiya “Aberdin”i ilə Bakıda keçirilən görüşdə baş hakim funksiyasını yerinə yetirib. Yeri gəlmişkən, həmin oyun Ağdam klubunun minimal hesablı qələbəsi ilə başa çatıb. Bir il sonra isə ÇL-in təsnifat mərhələsində Bakıda qolsuz bərabərliklə bitən Çexiya “Viktoriya”sı ilə oyunda dördüncü hakim olub.

Sloveniyalı referi cari mövsümdə ÇL-də 3, AL-də 2 və KL-də isə 1 oyunda fit çalıb. DÇ-2026-nın seçmə mərhələsində isə üç oyunda baş hakim rolunu icra edib.

Xatırladaq ki, dekabrın 10-da Tofiq Bəhramov adına Respublika Stadionunda keçiriləcək “Qarabağ” – “Ayaks” görüşü saat 21:45-də başlayacaq.