“Real”in və Türkiyə millisinin gənc ulduzu Arda Gülərin adı PSJ-nin transfer siyahısına düşüb. Fransa nəhənginin gənc istedadı heyətinə qatmaq üçün artıq hərəkətə keçib.
“El Nacional” nəşrinin yazdığına görə, Paris klubunun baş məşqçisi Luis Enrike Arda Güləri prioritet transfer hədəfi kimi müəyyənləşdirib və 100 milyon avro civarında təklif irəli sürüb. PSJ rəhbərliyinin artıq futbolçunun nümayəndələri ilə ilkin təmaslara başladığı və Ardanın “Real”dakı vəziyyətini diqqətlə izlədiyi vurğulanır.
Luis Enrikenin planlarına əsasən, Arda Gülər komandanın yeni pleymeykeri (oyun qurucusu) olacaq. Fransa klubu transfer prosesini sürətləndirmək və gənc ulduzu qısa müddətdə heyətinə qatmaq niyyətindədir.