Böyük Britaniyanın nüfuzlu “The Guardian” nəşri, Çempionlar Liqasında “Liverpul”la qarşılaşma ərəfəsində “Qarabağ”ın və onun baş məşqçisi Qurban Qurbanovun keçdiyi tarixi yoldan bəhs edən geniş məqalə dərc edib. Məqaləni ixtisarla təqdim edirik.
12 menecerə qarşı bir əfsanə
2008-ci ilin yayını xatırlayırsınızmı? Pep Qvardiola “Barselona”ya, Yurgen Klopp “Borussiya”ya təyin olunanda, “Çelsi” Luis Felipe Skolariyə güvənirdi. O vaxtdan bəri London klubu 12 məşqçi dəyişdiyi halda, “Qarabağ”ın sükanı arxasında cəmi bir nəfər olub: Azərbaycanın “Ser Aleks Ferqyusonu” – Qurban Qurbanov.
Tarixi mövsüm və “enfild” sınağı
Bu mövsüm “Qarabağ” üçün ən parlaq il ola bilər. Liqa mərhələsinin son turunda “Enfild”ə səfər edən Ağdam təmsilçisinin növbəti mərhələyə vəsiqə qazanmaq şansı olduqca yüksəkdir. Hazırda 10 xalla 18-ci pillədə qərarlaşan komanda “Marsel”, “Bayer” və PSV kimi Avropa nəhənglərini geridə qoyur. Hətta bu oyunda məğlubiyyət belə, onların pley-off mərhələsinə yüksəlməsi üçün kifayət edə bilər.
Çərşənbə günü keçiriləcək oyun “Qarabağ”ın Avropadakı 204-cü matçı olacaq ki, bunun da 190-ı məhz Qurbanovun rəhbərliyi altında baş tutub. Onun gəlişinə qədər “Qarabağ” Azərbaycan standartları ilə belə kifayət qədər təvazökar klub hesab olunurdu. 2008/09 mövsümünün başlamasına bir neçə gün qalmış Qurbanovun sələfi Rasim Kara, o dövrün daha güclü tərəfi hesab olunan “Xəzər Lənkəran”dan gələn təklifi dəyərləndirərək klubu tərk etmişdi.
Sıfırdan zirvəyə
Qurbanov təcili əvəzedici kimi təyin edilsə də, ondan gözləntilər çox aşağı idi. 2006-2024-cü illərdə “Qarabağ”ın formasını geyinmiş Maksim Medvedev həmin günləri belə xatırlayır: “O, gənc məşqçi idi və o dövrlərdə yerli mütəxəssislərə çox etibar edilmirdi. O, hər şeyə sıfırdan başladı və heç kim onun bu vəzifədə uzun müddət qalacağını düşünmürdü. Lakin tezliklə onun mükəmməl məşqçi olduğunu anladıq. İlk mövsümdə kuboku qazandıq, sonra Avropa Liqasında “Rusenborq “u keçdik. Macəra məhz o zaman başladı. Rəhbərlik Qurbanova tam etimad göstərdi və o, kənar müdaxilə olmadan komandanı addım-addım qurdu”.
“Qarabağ” ilk çempionluğunu 2014-cü ildə qazandı. Bundan sonra isə klub əsl qələbə maşınına çevrilərək son 11 mövsümün 10-da ölkə çempionu oldu. Paralel olaraq Avropa səhnəsində də yüksəliş davam etdi: mütəmadi olaraq Avropa Liqasının qrup mərhələləri və 2017-ci ildə Çempionlar Liqasının qrupuna vəsiqə.
Ulduzlar yox, sistem oyunçuları
Maliyyə imkanlarına baxmayaraq, Qurbanov heç vaxt səs-küylü ulduz transferləri arxasınca qaçmayıb. Onun strategiyası — fərdlərin cəmindən daha üstün olan bir kollektiv qurmaqdır.
Maksim Medvedev: “Biz heç vaxt “top-ulduzlar” transfer etmədik. Qurbanov üçün bütün oyunçular bərabərdir. O, intizamlıdır, lakin çox ədalətlidir. Həmişə oyunçularını müdafiə edər, onlara həm peşəkar, həm də şəxsi məsləhətlər verər. Hamı ona hörmət edir”.
“Qarabağ”ın hücum fəlsəfəsi
Qurbanovun fəlsəfəsi topa sahib olmağa və hadisələri qabaqlamağa əsaslanır. Medvedev deyir ki, 2020-ci ildə “Legiya” üzərində qazanılan 3:0 hesablı qələbə onlara istənilən rəqiblə hücum futbolu oynaya biləcəklərinə dair inam verdi.
Bu yanaşma möhtəşəm nəticələr doğurub: “Braqa” üzərində 4:2 hesablı qələbə, Xabi Alonsonun “Bayer”i ilə başa-baş mübarizə və keçən həftə “Ayntraxt” üzərində qazanılan 3:2 hesablı qələbə bunun sübutudur.
Yeni əfsanə
Əvvəllər Azərbaycan futbol tarixinin ən məşhur siması 1966-cı il dünya çempionatının finalındakı qərarı ilə yadda qalan Tofiq Bəhramov idisə, indi Qurban Qurbanov bu siyahıda öndədir. Lakin hazırda onun bir hədəfi var: nailiyyətlər siyahısına “Enfild”də qazanılacaq tarixi qələbəni də əlavə etmək.