Ötən həftə 1-ci liqada komandasının 0:2 məğlub olduğunu görən “Şahdağ Qusar”ın prezidenti Rahid Əmirquliyev forma geyinərək özü meydana çıxıb. Düzdür, Premyer Liqada 451 oyun keçirməklə rekordçu olan Əmirquliyev komandasına kömək edə bilməyib. Amma deyəsən uzaq Paraqvayda Rahidin nümunəsi başqa bir klub prezidentini ilhamlandırıb. Paraqvayın “Rekoleta” klubunun prezidenti Luis Vidal Əmirquliyevdən fərqli olaraq adını ölkənin futbol tarixinə yazıb. O, milli çempionatın “Nasiyonal”la oyununun başa çatmasına iki dəqiqə qalmış özü-özünü meydana buraxmaqla yeni bir yaş rekordçusu adını qazanıb. Vidal Paraqvay liqasının ən yaşlı oyunçusu olub – 51 il, 11 ay və 20 gün.
