2026-cı il Qış Olimpiya Oyunlarında ciddi siyasi və idman qalmaqalı yaşanır. Ukrayna Bobsley və Skeleton Federasiyasının rəhbəri Mixail Qeraskeviç, oğlu Vladislav Qeraskeviçə qarşı gözlənilən ağır cəza barədə açıqlama verib.
Məsələnin mərkəzində Vladislav Qeraskeviçin məşqlərə üzərində həlak olmuş ukraynalı idmançıların adları yazılan xüsusi dəbilqə ilə çıxması dayanır. Beynəlxalq Olimpiya Komitəsinin (BOK) siyasi mesajlarla bağlı qəti qadağasına rəğmən, idmançı bu addımı atıb.
Mixail Qeraskeviç oğlunun yarışlardan kənarlaşdırılma riskinin çox yüksək olduğunu bildirib:
“BOK-un dünənki tamamilə sarsıdıcı və kinik bəyanatlarına əsasən deyə bilərəm ki, bu gün üçün diskvalifikasiya qərarının verilmə ehtimalını 95% qiymətləndirirəm”.
Federasiya rəhbəri, həmçinin vurğulayıb ki, rəsmi qurumların sərt mövqeyinə baxmayaraq, Olimpiadada iştirak edən digər idmançıların əksəriyyəti Vladislavın bu hərəkətini və mövqeyini dəstəkləyir.